زجل : للناس الفهامة

بقلم :خليفة مزضوضي

قال لي خالي بكري
انتوما أولاد نستلي
هشاش مافيكم طيسا
تاكلو الطون او لاهريسا
تخليوا المعقول والرفيسا

الله يرحمو كان فيه التقشاب
نشدو فيه يضحك بلا عتاب
ديما يتهكم على وقتنا
زمانكم مرون كلو فتنة

زاد او قال لي واحد النهار
مالكوم مقنتين بحال الفار
حلو ديوركم او قلوبكم للجار
راه مايدوم غير الواحد القهار

دير البركة في عشاك تعشى
تحسب بزاف تبقى تما
ثق في نفسك اودير النية
وانعس في البيت مع الحية

مزاح بكري هو معقول اليوم
كلامكم ناشف بحال الكوم
وجهكم معبس يشبه البوم
طلقو البشرة يااخر القوم

مال هضرتكم غير على البينكا
الفيش والكونجي في رستينكا
الرونضة ماشي ديما ترينكة
لعب بوراقك ياتريكت حنيقزة
قبل مايجمعوا او ديرو ميسا

مشيتي قبل لاتشوف لعجب
الله يرحمك ويغفر الذنب
جيل اليوم مايعرفش حشومة
الضسارة حتى في وسط الحومة
مافاهم والو او ماعليه لوما
الوالدين تايتفرجو حتى هوما

الكلام قلال او قرب اتقادا
بنادم ديما “مكونيكتي” اش هذا
هو حداك او جسدو حاضر
لكن عقلو غايب او طاير

الانترنت اولات لغة رسمية
لي جهلها يبقى خارج التغطية
مشى في الصباح قبل العشية
يكلم نفسو على هاذ الوضعية
بحال لي لابساه الجنية

كملات الباهية في هاذ العام
جات كورونا او شغلات البال
مانفع معها لا علم ولا مال
تذكرت كلام خالي في الحال
على فعايلنا لي ماليها حصار
يحشم منها ابليس الغدار
تخلط عندنا الليل مع النهار
هذا عقاب من عند ربنا الجبار

نتمنى نكونو استوعبنا الدرس
نرجعو لبعضنا وننساوو الفلس
راه تفلسنا اكثر من القياس
او هادشي كلو ماكاين لاش

رجاءنا في العلي القدير
ان يزيل عنا هذا الوضع المرير
الله كبير ماتخفى عليه خفية
في رمشة عين يغير الكونية


شاهد أيضا
تعليقات الزوار
Loading...